Гӏалгӏайчен Минздраво, ТФОМСо тӏахьожам чӏоагӏбергба унахцӏенон дешашта
Гӏалгӏайчен Паччахьалкхен вице-премьера Мутаӏаланаькъан Хьажбикара йоккха кхетаче дӏайихьар, из хетаяь яр республикера унахцӏенон даькъ тӏара болх тоабара. Цига дакъа лоацаш хилар унахцӏенон министерствон, лорий страховой фонда, страховой лорий моттигий, иштта республикан дарбанчений керттера лораш.
«Унахцӏенон министра гӏончас Настаева Аминас хоам бир, 2025 шера 12-зза тӏахьожама болх дӏабихьа хиларах, цу юкъе наха даьча дехарашта тӏехьа дӏабихьа болх а болаш. Гучадаьлар каьхатацара хьал дика цахилар, паччахьалкхен тешама Программа кхоачаш мишта ю белгалдеш цахилар, гӏирсаш тишденна хилар, белггаларча наха доагӏаш дола хьалаш цалеладар. Цу дерригача хаттарашцарча кхоачамбоацарашта хоадам боллаш ха оттайир уж юстардахара», - аьлар «Сердало» газетага Гӏалгӏайчен Паччахьалкхен зарбан болх лелабераша.
Дӏадахача шера, республикан Минздраве 580 дехар дера, царех 11 шозлагӏа доагӏаш дар. Дӏабихьача балхо хьагойтар, царех 89,2% нийса а доагӏаш а долга. Боахама говзанчаша иштта техкар 238 хаттар, уж дувзаденна дар лорий новкъостал дезаш хиларца. Тӏахьожама болх дӏахьош уж деррига хаттараш чӏоагӏдир.
Кастагӏа нийслу хаттараш хул дӏахьош долча дарбанца е молхаш эшаш хиларца дувзаденна, санаторен-курорта дарба дезаш. Иштта хаттарашта юкъе дар заӏапхо хилар чӏоагӏдар дехаш дараш, Россе кхыча моттигашка дарба де дӏахьожабар дехаш, лаьрххӏача операце бӏухой дезал хьаллацар дехаш. Царца цхьана унахцӏенон Министерствонна баркал оалаш дола каьхаташ а дар. Цар тӏа бахархоша белгалду шоашка лораш дика хьажар, балха говзал лакха хиларах шоай вахар кӏалхардаьккхарашта баркал оалаш.
Кхетачен чаккхе еш, Гӏалгӏайчен унахцӏенон Министерствонна, ОМС даькъ тӏарча ганза тӏадиллар мехкарча лорий моттигашца беш бола болх чӏоагӏбар, кхоачамбоацараш дӏадахар. Цу балха лоархӏамегӏа дола дакъа да, наьха хаттараш доаггӏача беса теркалдар.
