Унахцӏенон министерствос керасти дир, Шолже травматологи яц яхача къамаьла
Гӏалгӏайчен унахцӏенон Министерстве дийцар; бувзама оагӏонашка лелаш дола, Шолжа кхален керттерча дарбанче лор-травматолог вац яха къамаьл бакъдоацилга.
«Лорий балха тӏа хувцамаш хилар, из бакъда: цхьа лор травматолог балхара дӏаваьннав ший цӏагӏа нийсденнача бахьанах, шоллагӏвар аргӏанарча отпусках вахав. Иштта дар аьнна доацаш, из хьал ӏаткъаш хиланзар бахархошта лорий новкъостал дара. Шолжа дарбанче травматологически новкъостал ма дарра де таро йолаш я.
Лораш шоаш массаза беш бола болх дӏахьош ба. Иштта лор-травматолог кхален дарбанче нах тӏаэцаш ва. Беррига говзанчаш чӏоагӏъяьча графиках болх беш ба», - аьлар «Сердало» газетага моттигерча унахцӏенон Министерстве.
Тхоца къамаьл даьча сага яхачох, цу дарбанчера хьал даима теркама юкъе да, эшача хана говзанчаш шоай моттиге хургболаш, дӏахьош ба болх. Нах отпусках болхаш е кхыдола хьал этта моттиг хилча, царна хьалхара арабоах кхыбола цу даькъ тӏара говзанчаш. Республикан бахархошта шоай ханнахьа эшаш дола лорий новкъостал дӏакхоачаш да.
