Укх бетта массехк гойтама проект дӏаяхьа лерхӏ мехкарча МКЖР
Мехкахбаьхача наьха Мемориале къаман культураца, истореца дувзаденнараш довзийташ болча балха юкъе дакъа лаца бех бахархой. Укх бетта массехк гойтама проект йоаржае лерхӏ цига.
Россе тӏема фецарча низа Ден хетаяь «Гӏалгӏай - Российски авиаце истореца» яха видеогойтам дӏахьоргба цига маьцхали беттацарча 10-ча денгара 16-ча денга кхаччалца. «Сердалога» из хоам бера МКЖР. Гӏалгӏай къаман лётчикаша тайп-тайпарча ханашка гойтача майралах, цар хьабенача наькъах дувцаргда цига.
Цун тӏехьа, 16-ча денгара маьцхали бетта 25-ча денга кхаччалца, хургба РФ Паччахьалкхен байракха Денна хетабаь «Даьхен байракх - сийлен белгало» яха видеогойтам.
Дӏахо, 18-ча денгара 31-ча денга кхаччалца археолога Денна, Дерригача дунен суртий Денна хетабаь «Гӏалгӏайчен кхеран оаламаш» яха гойтам хургба. Лоамашкара гӏалай юрташ йовзийташ болх хургба цох.
Бутт чакхбоалаш, 25-ча денгара 31-ча денга кхаччалца «Кинобийса» яхача Ерригача Россе боламга гӏолла «Гӏалгӏайчера киноговзал» яхача гойтамо мехкарча режиссёрий толама балхаш, къаман кинематографе истори довзийтаргда мехкахошта.
Иштта бӏарчча бетта болх беш хургба музее «Лайнар. 70 шу даьнначул тӏехьагӏа» яха къаман исторически дагалоаттамах бола суртий гойтам.
