Шолжа-Шахьарерча РДК спектакль гойташ хилар вай мехкара кагирхой театр
Шолжа-Шахьарерча культуран Цӏагӏа спектакль гойташ хилар вай мехкарча кагирхой театра актёраш. Режиссера Галай Мурада оттаяь «Таханара гӏулакхаш» яха дуккханешта езаенна спектакль яр цига йихьар.
«Чахкенаькъан Саӏида йоазонах «Цех» яха комеди гойташ дӏайолаелар сайре. Шоай мел йола говзал сомаяьккха, гулбеннарий дегашта тоам бе гӏерташ кхесташ бар актёраш сцена тӏа. Хӏаьта комеди-м моллагӏчун тоам бергбарех яр. Массанена дика бовзаш, безабенна бола, лакха начӏал дола актёраш бар къахьегаш хиннараш.
Бакъда театральни сайре цу тӏа чакхйоалаш яцар, Ахмадовгӏар М. балхах оттаяь «Хьаста юхе» яха цхьан дакъах латта пьеса хьекхар цига. Гуш дар, зале мел багӏа хьажархой дега тоам хинна болга. Белаш, бегаш беш, юкъ-юкъе актёрашка дош кхоссаш, дӏайихьар цар из безаме сайре», - дийцар «Сердалога» театра болхлоша.
Белгалде деза, иштта йолча моттигашка гулбала, шоай дега салоӏам бе ловраш вай къаман юкъе хӏара денна дукхагӏа хулаш латтилга. Геттара сакъердалу наьха; гӏалгӏай меттала йолча беламеча спектаклашка, комедешка хьожаш. Театр саг тӏаозаш, дукха керда хӏамаш цунна довзийташ йола моттиг я, хӏаьта вай къаман театре наьна меттала йола спектаклаш бахархошта къаьстта боча я.
