Екатеринбургерча МФМ-2026 дакъа лоацаш хургба вай мехкара кагирхой
Халкъашта юкъерча кагирхой 2026 Екатеринбургерча фестивале дакъа лаца баха безача мехкарча доакъашхошца кхетаче дӏайихьар Магасе. «Сердалога» из хоам бера республикан кагирхой гӏулакхех йолча Комитетера.
Къонача хьинардарашца цар бахьа безача наькъах, кхоачашде дезарех дийцар. Гӏалменаькъан Саӏида доакъашхошта довзийтар цу программах, викалий кхоачашде дезарех. Къаьстта терко йир кхерамзленца дувзаденнарашта, фестивала кхетаченашка лораде дезарашта.
МФМ-2026 дакъа лоацаш хиларо тайп-тайпарча республикашкара къонабараш бовзийтаргба вай кагирхошта, пайданедараш дӏа-хьа эцаргда, юкъарча, вахара оагӏонцарча проектех дувцаргда.
«Вай республикан цхьаццадолча гӏулакхашка диллача, чӏоагӏа лоархӏаме кхетаче я из. Мехка проекташ, иштта кхоачашде лаьрхӏараш довзийтаргда цига къонабараша, шоай аьттув баьннарех, лаьрхӏарех дувцаргда, шоаш санна барашцара бувзам чӏоагӏбергба», - йоах тхога бенача хоамо.
Фестивале дайзараш вай мехка дӏахьоча балха юкъе накъадаргда къонабарашта, хӏаьта цига байзарашца цхьана пайдане хургйола проекташ йоаржае йиш хургья. Вай республика дикача оагӏорахьара дӏайовзийта, накъадаргдараш хьаэца аьттув хилба вай къонабарий цу фестивале!
