Музейс а книжко а дувц Гӏалгӏайчен тохкама урхаллен дӏадахачох
Гӏалгӏай Республике гӏолла йолча Россе СК урхаллене книжка арадаьлар, иштта музей хьайийллар, уж хӏамаш довзийташ моттиг хилар, яхаш, хоам бу «Сердало» газетага цигарча болхлоша.
«Гӏалгӏай Республике гӏолла йола Россе СК чуйоагӏа моттиг хьакхелла 15 шу дизара хетаяь кхетаче дӏайихьар. Цун кулгалхочо аларах, тохкама урхалле хьакхоллара, дегӏаахара хетадаь книжка арадаьлар, музей хьайийллар.
Уж проекташ кхоачашъеш я къонача болхлошта патриотически кхетам балара даькъ тӏа. Кхетаче дӏахьош дакъа лоацаш хилар урхаллен кулгалхо, тохкама ветеранаш, болхлой, иштта книжка яздаьр», - аьлар хоамо.
Из урхалле хьакхеллача денз, цо баь болх го йиш я книжка тӏа. Йоккха терко лоаттаю болхлошта, республика дегӏайоалаеш шоашкара дакъа цар юкъедихьа хилар белгалдеш.
Тохкама урхаллен истори кердача музее гулдаьд: тӏабувхабеча гӏирса кеп, совгӏаташ, тохкама болх дӏахьош кораяь хӏамаш, дӏадахача шерашкара криминалистика техника.
Гӏалгӏай Республике гӏолла йолча тохкама комитета кулгалхочо Асхабов Ахьмада белгалдир; балха истори, ӏадаташ лорадар лоархӏаме хилар; бехктокхаме болаш, шоай профессех доаккхал деш кагирхой кхебара.
Музей хьаелларах, книжка арадаларах лоархӏаме дола цӏай хилар Россе тохкама комитета викалашта.
