Гӏалгӏайчен ИЗО музейс дешархой теркам тӏаоз
Гӏалгӏайчен паччахьалкхен суртанчий музее дӏахьош я «Культура дешархошта» яха федеральни программа. Из лаьрхӏа я кхувш йоагӏача тӏехьенна хозача хӏамах кхетам балара, дешархошта дика таронаш луш, исбахьален искусство йовзийтара, гӏалгӏай къаман ӏадаташ, культура кӏоаргагӏа ӏомаяра.
«Укх наькъа музее баьхка хилар Шолжерча №8 йолча юкъерча ишкола дешархой. Царна экскурси еш яр Пхьиленаькъан Лиза. Берий таро хилар искусствай кхоллам юххера бовза, республикан культуран вахарах лаьца шоашта ховр шерагӏа доаржаде. Цар таро хилар искусствай дуне хьаделла, цун керда оагӏонаш го», - аьлар «Сердало» газетага ИЗО Паччахьалкхен музея зарбан болх лелабераша.
Цу тайпара музеера кхетаченаш дӏахьош хиларах, цар къонача хьаькъалца дус даьй ӏадаташ, исторически дагалоаттамаш. Культура - из массайолча оагӏорахьара хьалаш луш бола моттиг я. Цудухьа лоархӏаме да кхувш йоагӏача тӏехьенца бувзам лелабар, цунна цу даькъера дикагӏдараш довзийтар.
