ГӏалгӀайчен мехктохкама музея кердача гойтамга хьажа бех бахархой
Малсаганаькъан Т.Х. цӀерагӀча паччахаьлкхен мехктохкама музее бех вай бахархой, хьаьший керда гойтам бовза. Археологе зале гулбаьб керттера болх, уж да дукхача шерашка гӀалгӀай къаман вахара наькъ тӀа нийсденна тешалаш. Гойтамо таро лу дукхача ханашка кхача - тӀема скифашкара, сарматашкара ХӀХ бӀаьшерен вахарга. Укхаза хӀара хӀама - из духхьал музея гӀирс хинна Ӏац, из да къаман белгалон дакъа.
«Теркама юкъе ба итта гӀирс- «Акинак» яха скифски тур, наькх тӏа боаллабу алански дошо маха, амазонка кий, бӀухочун гебагӀа, сармата бӀухочун кий, кхуврча зӀи, борза аьрзи, Гарданаькъан Тоаркхо-Хьажий тур, курхьарс оала кхалнаьха керта тӀа туллабу гӀирс, къаман ферта кӀувс - истинг», - аьлар «Сердало» газетага мехктохкама музее.
Из дийна исторически хьал да, цо таро лу гӀалгӀай къаман никъ го, гаьнарча ХХ бӀаьшерашка денз хьабоагӀаш бола. Гойтамо таро лу бӀаргаго лоамарой вахара хьал мишта хувцаденнад, цу юкъегӏолла къаман белгалонаш йоа ца еш. Цу гойтаме истори го йиш я ше ма-дарра.
