Мехкарча «Мужече» яхача СТЦ доазон тӏа латархошта лаьрхӏа модульни зал хьалъергья
2026-ча шера дӏаболабе лерхӏ «Мужече» яхача спорта кийчо еча моттиге латархошта лаьрхӏа зал хьалъеш бола болх. Из хоам «Сердалога» бера Мехкадаь зарбан болх лелаберашкара. «Из болх дӏахьош ба физически культура, спорт йоаржаярах йолча паччахьалкхен программага гӏолла.
Спорта лаьрхӏа зал, тренерашта къоастаяь моттиг, лорий кабинет, иштта кхыдараш хургда цу чу. Дийнахьа 100 саг тӏаэца йиш йолаш хургья керда зал. Дегӏа могашал эшаеннарашта лаьрхӏа а моттигаш къоастаергья цига», - белгалдир вай мехкадас Келаматанаькъан Махьмуд-ӏаьлас, цу оагӏонцарча хувцамех дувцаш.
Спорта ишколашкарча, секцешкарча спортсменаша шоай говзал лакхъергья цига, иштта мехка а кхален а яхьаш дӏакхахьа аьттув хургба. Пхи шу да «Мужече», хувцамаш деш, болх дӏабихьа. Тахан цига дӏакхухь республикански, иштта ерригача Россе яхьаш, мехка тайп-тайпарча моттигашкара спортсменаш ба цига тӏалаттараш. Хӏаьта тахан цига эш латархошта лаьрхӏа моттиг.
«Боксе, иштта кхыдолча латарашца къахьгараш кӏезига бац вай тахан. Керда зал хиларо дикка аттачахьа доаккхаргда цар яхьашта кийчо еш дола гӏулакх», - белгалдир вай Мехкадас. Спорта оагӏонца дувзаденнарашта мехка кулгалхоша тахан йоккха терко лоаттаю.
2026-2027-ча шерашка таханарча ханага хьежжа йола 15 моттиг хьаелларгья вай мехка, цул совгӏа, Наьсарерча, Яндарерча, Долакха-Юртарча, ӏаьлий-Юртарча «хьаькъал долча» доазошта лаьрхӏа керда кхоачам эцаргба, Шолжа-Шахьаре ГТО дӏаяла йоккха йоаца моттиг хьалъергья.
