Магасерча наькъашка 84 кхоачамбоацар теркалдир ӏаьдало
16.12.2025 10:48
Магасерча наькъашка рейд дӏаяхьа арабаьннача ӏаьдала болхлоша 84 кхоачамбоацар теркалдир. Цу юкъе дар наькъашкара бокъонаш цалархӏар, иштта РФ КоАП 12-ча оагӏон 3.1 даькъах (кораш баьд- дерзадарах) дола кхоачамбоацараш.
«Сердалога» из хоам бу МВД болхлоша. «Республикерча чухьарча гӏулакхех йолча министерствон кулгал деча Котов Владимира тӏадилла, дӏахьош болх бар из. 84 кхоачамбоацар да нийсденнараш.
12 машина кораш тӏара пленка ӏояьккхар ӏаьдала болхлоша цу моттиге, иштта 23 сага ха оттаяь тӏадиллар тонировка дӏаяккха аьнна, 8 машин ӏочуйигар», - йоах тхогарча хоамо. ӏаьдала болхлоша соцавир зулам дарах федеральни оагӏонца лохаш вола саг, 9 мм калибрах йола 8 патрони Макарова тепчеи юкъе йолаш, шин сагагара герз лаьцар.
