Гӏалгӏайченна къаман проекташ кхоачашъяра 5,2 миллиард сом совгӏа ахча лургда
Карарча шера къаман проекташ кхоачашъе Гӏалгӏайченна 5,2 миллиард сом совгӏа ахча хьадайтаргда, аьлар «Сердало» газетага республикан кулгалхочун зарбан болх лелабераша.
«Из вай паччахьалкхен Кулгалхочо деш дола доккха новкъостал да, цо таро лу мохк дегӏабоалабе. 2026 шера, оаха дӏахохьоргба ишколаш, берий бешамаш хьалъяра, дукха дезал бола фусамаш хьаллацара, коммунальни хьал тоадара, шахьараш, юрташ кердаяхара бола болх», - аьлар Келаматанаькъан Махьмуд-ӏаьлас.
Цо белгалдир, цу тайпарча проекташа кхоачашду лоархӏаме хаттараш, иштта наьха вахар а тоаду.
Из боккха а даим беш бола а болх дукхача оагӏонаш чулоацаш дӏабахьа гӏерт. Цунна чудоагӏаш да боккхийча наха вахаре новкъостал дар. Иштта Сурхо тӏа хьалдергда новкъостал эшача наха лаьрхӏа дола цӏа.
Дешара даькъ тӏа цӏенхаштта тоаергья ӏарпенаькъан Ю. цӏерагӏа колледж, иштта керда ишколаш хьалъергья Кердача Реданте, Пхьилекъонгий-Юрта, Гӏажарий-Юрта, Галашка, цига дешара дика хьалаш хьакхолларгда.
Цул совгӏа наькъаш тоаде лаьрхӏад, коммунальни балхаш, культуран гӏулакхаш кхоачашдергда, юкъара доазош тоадергда, цу даькъе Насарен ӏам а болаш.
Цул совгӏа, моттигерча ӏаьдало эцаргья 20 керда автобус, цар таро лургья дукхача наха шоай ханнахьа, кхерамзле йолаш, дӏа-юха аха.
Даим терко лоаттаю моттигерча кагирхошта, цар политика дегӏайоалаяра, республикан бахархошта дикагӏа дола хьалаш хьакхоллара, уж массайолча оагӏорахьа дегӏадоаладеш.
