18 миллион ахча хьожадергда, вай мехкара хьунаш меттаоттаяра
Моттигерча экологена йоккха терко лоаттаеш ба мехка. 2026-ча шера мехкара хьунаш меттаоттаеш боккха болх дӏабахьа лерхӏ. Из хоам «Сердалога» бир мехкадаь зарбан болх лелабераша.
«Дикка къахьийгад цу оагӏонца укх тӏехьарча шерашка. 2019-ча шергара 2025-ча шерга кхаччалца йолча хана къахьегаш, 570 гектар хьу меттаоттаяьй. Къаман проектага гӏолла къоастадаь хӏара сом, пайдан тӏехьа дӏадохийташ, болх бе беза. Цу юкъе да керда гаьнаш дӏайогӏар, таханарча ханага хьежжа йола, къаьстта цӏерцара кхерамзлен хьал лорадара тӏехьа хьун юкъе чӏоагӏа эшаш йола техник, иштта кхыдараш а.
Мехка Президентага гӏолла, тахан вайга дикка аьттув ба, хӏаьта вай декхар - болх боаггӏача боараме чакхбаккхар»,- белгалдир мехкадас Келаматанаькъан Махьмуд-ӏаьлас.
«Экологически паргӏато» яхача къаман проектага гӏолла дӏахьош ба из болх. 18 миллион ахча да хьун хьал меттадоаладеш, керда гаьнаш дӏайогӏаш, дикагӏа йола техника ӏалашъеш, хьун доазонаш дӏашердеш, хьунашка цӏи дӏайоае мел эша кхоачам кийчбеш дӏадохийтаргдар. Укх бӏаьстен хана дӏахьоргба хьунагӏа гаьнаш дӏайогӏаш бола болх. 35 гектар доазон тӏа къахьегаргда цу оагӏонцарча болхлоша.
