Гӏалгӏайчен Халкъа фронто безбир музейшта юкъерча яхье котбаьннараш
Гӏалгӏайчен лоӏамхой тароний центре лаьрххӏа йола кхетаче хилар. Цига безбир Ерригроссийски музейшта юкъерча моттигерча даькъ тӏа котбаьннараш. Кхетаче дӏахьош яр «Исторически дагалоаттам» яхача «Цаӏ йолча Россе» федеральни партийни проект кхоачашъяра чуйоагӏаш. Цун керттера маӏан – вай мехка дӏаяхача ханара турпала наькъаш довзар, дешара моттигий музейшта юкъера дикагӏа дола балхаш хьаллацар, кхувш йоагӏача тӏехьенна, Даьхенцара безам совбоаккхаш, кхетам балар.
Из кхетаче хозъеш хилар лаьрххӏа йола патриотически майда, из болх баьр яр Халкъа фронта моттигера отделени, «Къона патриот» яха кагирхошта кхетам балара тӏема-патриотически центр, иштта «Патриот» яха тохкама тоаба.
«Кхетаче дӏахьош вена хилар Халкъа фронта моттигерча штаба доакъашхо, «Цаӏ йола Росси» яхача парте «Исторически дагалоаттам» яхача федеральни партийни проекта болх лелабу Муружанаькъан Мухьмад, иштта Халкъа фронта моттигерча даькъа шоллагӏа председатель Бохтаранаькъан Мадина.
Хьаьшашта довзийтар «Патриот» яхача тохкама тоабанна, «Дагалоаттама вахта» дӏахьоча хана, Магӏалбика дукъ тӏа корадаь тӏема гӏирсаш. Гойтама юкъе дар Сийлахь-боккха Даьймехка тӏом лаьттача даькъ тӏа корадаь гӏирсаш, иштта укх заман российски бӏухой тӏема таронаш-дронаш, бронежелеташ, автоматаш, кхыйола тӏема кийчо. Къаьстта йола моттиг дӏалаьцар электронни тиро. Шоашта цига фу мог хьажа безам болаш дар бераш, боккхагӏбараш - цу моттига юхе саг дӏаоттилга дацар, уж сов дукха болаш», - аьлар «Сердало» газетага Гӏалгӏайчен Халкъа фронте.
Из болх вӏашагӏбеллараша белгалдир, цхьана кхетаче а интерактивни даькъ тӏара болх а дӏахьош хиларо таро елар мах барашта гонахьа тамашийна цхьоагӏон хьал хьакхолла - къаман истори, культура, даьй турпала гӏулакхаш лархӏа.
