СВО бӏухошта хӏамаш йихьар Къаман фронто
Запорожски областе тӏема декхараш токхаш латтача 503-ча мотоиччархой сура бӏухошта лаьрхӏа ши мотоцикл, токацара генератор ӏокхаьчар. «Къаман фронт. Деррига а Котало бахьан!» яхача проектага гӏолла, мехкарча президентски болама хьинардараша чакхбаьккха болх ба из. Россе МВД моттигерча болхлоша деш гӏо да из вай бӏухошта.
«Хӏамаш, ӏокхаьча, вай бӏухошка я карарча хана. Тӏема операци йодача аренашка лоархӏаме декхараш кхоачашде, моастагӏчох лорабала чӏоагӏа эшаш я уж. Хала декхараш токхаш латтача бӏухой уйла еш, царна гӏо деш, оагӏув хьаллоацаш хиларах; доккха баркал кхайкаду мехкарча Россе МВД оагӏон болхлошта. Дийца варгвоацаш, доккха да тахан оаш дер! Хӏаьта тхо а, тӏатеӏӏа, тхоай оагӏорахьара болх дӏахьош хургда массахана. Хӏамаш хьагулъяр, ӏойихьа вай бӏухошка дӏакхачийтар – тха лоархӏаме декхар да! Деррига а Котало бахьан да!» - йоах «Сердалога» Къаман фронта моттигерча оагӏон хьалха латтача Танкенаькъан Баширагара бенача хоамо.
Тӏема операцена юкъе денал, майрал гойташ, шоай декхараш токхаш латтача вай бӏухошта терко яр, цар хьашташ кхоачашдар керттерча декхарех да тахан. Къаман фронто моттигерча оагӏонца тӏемахошта эшаш бола кхоачам гулбеш къахьег. Цу юкъе дакъа лаца йиш йолаш ва моллагӏа саг.
