Гӏалгӏайчен Халкъа фронто бӏухошта лаьрхIа гуманитарни мухь бахьийтар
Гӏалгӏайчен бахархоша дика хьаллаьцар «Деррига а - Коталонна» яха, республикан Халкъа фронто хьакхайкабаь, бӏухошта лаьрхӏа гуманитарни мухь гулбара болам. Лаьрххӏа йола операци дӏахьоча, 58-ча полка, 503-ча полка эскар долча дӏабихьар бувзама гӏирс, иштта хӏара денна эшаш йола хӏамаш: кхачан даараш, молхаш, цӏено лелаяра бола кхоачам.
«Гуманитарни мухь гулбир Гӏалгӏайчен къахьегама моттигаша, бахархоша. Федеральни йоала гIулакхах йолча урхаллено, бӏухой дехарах радиостанцеш яхьийтар; «Йоагаяь кхелаш» яхача дика гӏулакхаш лоаттадеча ганзо - човнаш ерзаю маркхалаш, кремаш; Гаьгенаькъан Г.А. цӏерагӏча Наьсарен колледжо - пхьегӏаш, миччахьа гӏолла чакхйоала мотоцикл; гIулакх дара а вахара а колледжо - метташ, гӏайбаш. Лорий санитарни даькъа лаьрхIа молхаш яхьийтар «Регион Юг» ОООс, Роспотребнадзоро.
Гӏалгӏайчен Федеральни кхерамзлен гIулакха болхлоша тӏема хьалхарча мугӏарашка латтача бӏухошта талхаш доаца дукха даар дахьийтар. Цу дерригне а бӏухой вахар кӏеззига мукъагӏа дӏайхагӏа, кхераме доацаш дергда»,- аьлар «Сердало» газетага Гӏалгӏайчен Халкъа фронте.
«Деррига а - Коталонна» яха белгало- из кӏоаргга исторически ӏадат гойташ я. Хала ханаш лаьттача шерашка, къаьстта халкъ цхьана хиларо тешаме Даьхен кхерамзле лораяьй. Из иштта мел долча хана, Российски эскар ховш да, шийна тӏехьа латтар, доккха доазув хинна а ца ӏеш; бIухой гаргара, кхоачара, хьамсара нах болга; уж бахьан долаш шоаш вахар дӏадала кийча ба эскархой.
Царна дика хов, шоашка хьежаш болга, шоаех доаккхал делга. Из накъадоал царна, дега бохам боалаш йола халонаш тӏехьайита, тешшаме Коталонга баха.
