Халкъа фронто аргIанара гуманитарни мухь бихьар Селий мехка
ГIалгIайчен Халкъа фронта, «Россе тIема ветеранаш» яхача мехка юкъарча моттига даькъа викалаш бахар аргIанара гуманитарни мухь ийца, вошал долча Селий Республике. Из новкъостал лаьрхIа да тахан чубаха фусамаш йоацаш биса нах хьаллацара. Укх наькъа царца вар ГIалгIайчен лоIамхой тароний центра кулгалхо Галай Назир.
«Дика дакъа лаьцар гуманитарни мухь вIашагIтохача Пхьиленаькъан Назира. Из бахьан долаш эца таро хилар низ бола ток лоаттаю генератораш, йиъ мотопомпа шоай кулгахйоахкоргашца, уж ца хилча яргйоацарех яр. Волонтерий тоабо а шоай оагIорахьара новкъостал дир: доазонаш цIендара 50 бахьа бел, 50 ира бел, 10 пара хьамча иккаш, 50 догIах бувхабеш бола гIирс-пончо, 200 пара балха лелаю кулгахйоахкоргаш, 30 корта лорабу кийнаш-каскаш, 1200 метр дIаьха доазув къоастадеш тохаш дола 24 оаса – яхьийтар цар новкъостал эшарашта. Иштта царна юкъе яр доагора лаьрхIа пхиъ аьшка канистр, 200 литр чуйода чIоагIагIа дола 100 гали. Уж дар тхогара хатар денараша дехаш хиннараш, тхо хьалхагIа дахача хана», - аьлар «Сердало» газетага Халкъа фронта моттигерча исполкома кулгалхочо ТIонганаькъан Башира.
Халкъа фронто, ГIалгIайчен волонтёраша цхьана бихьача наькъо хьагойт вай республика лоалахошта оарцагIъяла кийча хилар. Цига хиннараша яхачох, цу тайпара новкъостал дар - из дукхача бIаьшерашка денз гIалгIашта, селашта юкъера бувзам чIоагIбеш хилар да.
