Къаман фронто Селий мехка хӏамаш яхьийтар
Мехкарча Къаман фронто хӏамаш яхьийтар хий чухьийдда геттара халача хьале эттача Cелий мехкарча наха. Регионерча унахцӏенон профсоюза болхлоша, бизнесмена Хаматхананаькъан Ӏалихана гӏо дарах хало тӏаенача наха хий дӏаоза эшаш дола генератораш, помпаш ийцар.
«Иштта цу хӏамашта юкъе яр метта поарталцара хӏамаш, кхача, вай республикерча «Россе тӏема моттигашкара ветеранаш» яхача оагӏон доакъашхоша ӏалашъяь вахаре хӏара дийнахьа эшаш йола хӏамаш; иштта, кегаденнача хӏамай гувнаш дӏа-хьа доахаш, эшаш дола гӏирсаш. Махачкалерча МЧС складе ӏодахьийтад из деррига», - дийцар «Сердалога» Къаман фронта исполкома кулгалхо волча Танкенаькъан Башира.
Цӏаьхха, эттача хатаро цу наьха деррига вахар кегадаьд, геттара воча хьале эттад дог деха дола адам. Хӏаьта а вайна гу тахан деналца, ца боха гӏерташ уж цу хатара духьалъэтта. Вай декхар да царна уллув хилар, царга ма могга хьажар.
Царна яхьийта хӏамаш гулъеш ба мехка. Геттара чӏоагӏа цига эшараш – хий хьаоза мотопомпаш, ток лоаттае генератораш, иштта мала хий. Вай лоалахой хинна ӏац, бӏаьшерашкара денз вӏаший вошал леладеш, хьадоагӏаш дола ши къам да вай.
Цунга хьежжа, моллагӏа хало кхаьчача гӏо де, уллув отта кийча да вай.
