Гӏалгӏайчен халкъа фронто Донецке генератораш хьоргья БПЛА бӏуна
Гӏалгӏайчен Халкъа фронта моттигерча даькъе вера вай мехкахо. Из ва лаьрххӏа йола тӏема операци дӏахьоча даькъ тӏа ший тӏема декхар кхоачашдеш вола бӏухо. Цо дийцар, ше волча моттиге, пилот чувоацаш гӏетташ долча гӏирсашца болх бара, хӏанз керда бӏу вӏашагӏболлаш хиларах. Цунна, дика болх бергболаш, лаьрххӏа дола генератораш эш. Даьхен бӏухой дехар кхоачашде лаьрхӏар.
«Оаха кхайкарал дир тхоай спонсорашка, царна новкъостал дар дехаш. Хьалхарчарех оарцагӏбаьлар Федеральни казначействон моттигерча Урхаллен болхлой. Цар, «Халкъа фронт. Деррига Коталон!» яхача новкъостала чудоагӏаш, вай бӏухошта кхоъ генератор елар. Цхьаволча сага из ток хьаозара бола гӏирс мара бац, хӏаьта тӏема хьалхарча мугӏарашка латтарашта - из сердал, бувзам, оборудованена еш йола зарядка я, цул совгӏа цо таро лу чоалхане латтача хьалашка тӏема декхараш кхоачашде. Кастлуш оаха уж генератораш дӏакхоачийтаргья Донецке вай бӏухошка», - аьлар «Сердало» газетага Халкъа фронта Гӏалгӏай чен даькъа исполкома кулгалхочо Тенканаькъан Башира.
Халкъа фронто дег чура баркал оал цу гӏулакха юкъе дакъа лоацача наха а, доалахьара хӏама леладерашта, хьинар дарашта, иштта шоаш хьаллоацаш мел барашта а. Бӏухошта из доккха новкъостал да.
