Буро кӏалхарча бераша озаш йола хало теркалйир Къаман фронто
Буро кӏалхарча Кхоартой цӏерах болча урам тӏа дахача, №3 йолча ишколе цига гӏолла дӏаухача бераша токхаш латтар тахан йоккха хало я. Наькъа юкъе доахкача кӏоагашка тӏоадал хьаэттача, лоа дашаш хилча, хин ӏамаш хьахул, ког ӏоловза йиш йоацаш колд эттача наькъ тӏагӏолла, когаш тӏоадабеш, хотташа баьхе дӏа-хьа ух уж. Дешархошта, цар цӏагӏарча ноаношта тахан боккха бала ба из никъ ишттача, бӏаргаго йиш йоацача хьале латтарах. Даьла денна цига гӏолла дехьадувла дезача берий дегашта йоккха хало я из.
«Геттара хала чакхъяла езаш я цига гӏолла машин. Цига доахкача кӏоагашка чулегар кхераш, тувсалуш, гобоахаш дехьадувлаш лел миска бераш. Наьха вахара йоккха хало еш хӏама да из никъ ишттача хьале латтийтар», - дийцар «Сердалога» Къаман фронто.
Юкъарлон оагӏонцара болхлой оарцагӏбаьнна, Наьсарен кхален администрацега дехар дир; из урам эггара хьалхарча аргӏанца тоаде дезача наькъашта юкъе оттабе, аьнна. Буро кӏалхарча бахархоша чӏоагӏа сатувс из урам лерттӏача хьале хургболча денга.
Бераш ишколе ухаш бола никъ колд латташ боацаш; цӏена, бекъа, шаьра хила беза. Таханарча хана ишттача хьале урама никъ латтийтар вӏалла а гаьнадалийта йиш йолаш хӏама дац.
