Дешара шу дӏадоладе берашта гӏо дир Къаман фронто
Дешара шу дӏадоладеш, хьалхара гургал техар мехкарча ерригача ишколай коашка. Делаш долча берий гӏар латт тахан массанахьа, классашка ший тайпара болх эттар. Чӏоагӏа лоархӏаме да дешара шу дӏадоладеча берий оагӏув хьаллацар, царна гӏо де хьажар, дог хьастар. Россе Къаман фронта моттигерча штаба болхло волча Чередниченко Александра дукха бераш долча, вахара хьал хала долча дезалашта лаьрхӏа барзкъаш делар.
«Тов бетта берий даьшта, ноаношта боккха низ тӏалатташ хул, хӏана аьлча ишколе додача бера эшар дукха да. Таро дика йоацача, дукха бераш долча дезале къаьстта хоалуш хул из. Кхыдарашта нийсса хозача, кердача гӏирсаца кийчденна дешара шу дӏадоладе аьттув хургболаш, оагӏув хьаллаца беза цар», - дийцар «Сердалога» мехкарча Къаман фронте.
Ишттача гӏулакхо хьагойт сагах дог лазаш хилар духхьала хозача дешашца дусташ доацилга, гӏо эшачун оагӏув хьаллацар, мах баь варгвоацаш, лоархӏаме долга. Хӏаьта къаьстта бера тоам бе хьажар, тахан доккха дика да.
