Докучаевскерча мехкахочоа гӏо дир Къаман фронта викалаша
Донецке дарба деш вола вай мехкахо волча баха хилар вайцигарча Къаман фронта доакъашхой. Тахан аттача хьале вац из саг, геттара чӏоагӏа хиннача човнех шаккха ког дӏабьккхаб цун. Докучаевск яхача шахьарерча дарбанче ва из карарча хана.
«Цун цӏен-нанас гӏо дийхар. Унахочоа молхаш, заӏапхой вордингаш еза. Новкъостал дергдараш сиха корабир. «Горизонт» яхача тӏахьожам беча моттига кулгалхо вола Шовхаланаькъан Исраила вордингаш, иштта вай мехкахочоа а юхерча палате бадарашта а эша молхаш ӏалашйир.
«Россе тӏема моттигий ветеранаш» яхача оагӏонца хӏамаш дӏаенна, цунца къамаьл деш ха яьккхар оаха. Дӏахо Ростове дарба де ӏоваха везаш ва из, цига протезаш оттае лерхӏ. Телефона номераш дӏа-хьа ийца, вӏаший бувзам лелабе чӏоагӏо йир оаха. Эшаш долча хӏамах хоам бе беза, тхо каст-каста Ростове дахе нийслу, дӏачуотта а гӏо де а хало яц», - дийцар «Сердалога» Къаман фронта доакъашхоша. Вай къамах йоаллаш чӏоагӏа беркате оамал я новкъастал де кийча хилар, вӏаший тӏаоттар. Даьхен лорабой оагӏув хьаллоацаш хила деза вай тахан.
