Букътӏехкаца хала лазараш долча унахошта гӏо дир вай нейрохирургаша
Геттара хала лоархӏаш йола ши операци дӏайихьар вай республикерча клинически дарбанче болх беш болча нейрохирургаша. Из хоам «Сердалога» бир цу оагӏонцарча министерствос.
«Букътӏехкаца геттара хала лоархӏаш дола лазараш долаш, дарбанче кхаьчача шин мехкахочунна лакха говзал эшаш йола операцеш дӏайихьар Гӏазгиренаькъан ӏумара кулгалдеча нейрохирургий тоабо», - йоах тхога бенача хоамо.
1970-ча, 1965-ча шерашкара ши кхалсаг яр букътӏехка моттигаш кагьенна, чӏоагӏа во хьал долаш, дарбанче кхаьчараш.
Нейрохирургий тоабо боаггӏаш бола болх дӏахьош, дикка къахьийгар царца.
«Букътӏехка човхам хилча, ма хулла сихагӏа операци дӏаяхьар лоархӏаме да, хӏана аьлча, боаггӏача боараме ханнахьа из болх чакхбаккхаро саг кӏалвисийтац, Даьла низаца», - дийцар тхога нейрохирургий тоаба хьалха латтача Гӏазгиренаькъан ӏумара. Белгалде деза, шаккха унахо тахан дикка меттайоагӏаш латтилга.
Иштта дола хӏама чӏоагӏа кхераме да сага дегӏа, цу човхамо саг вӏалла меттагӏвала йиш йоацаш вита йиш я. Хӏаьта эггара лоархӏамедар, ханнахьа дарба дӏадахьа, лакха говзал йола лораш нийсбалар да. Тахан, Даьла къахетамца, вай мехка болаш ба уж.
