Михалков Никитас мах оттабир Гӏалгӏайче дӏахьоча «Дошо Гӏала» яхача кинофестивала
Гӏалгӏайче лаьрххӏа хьайийллар Хӏӏ-гӏа Халкъашта юкъера «Дошо Гӏала» яха кинофестиваль. Цун доакъашхошка, хьаьшашка моаршал хоатташ Россе кинематографе Союза председатела, РСФСРа халкъа артиста Михалков Никитас къамаьл дир.
«Тахан российски кинон хьалхашка латт лоархӏаме декхар - нах дукхагӏа гулбергбола фильм хьакхоллар, иштта сагаца къамаьл дар, лоархӏамегӏа дар фуд хара. Вай исторех, дагалоаттамах, дезалах, цун бехктокхамах, ший мохк безарах, сага оамалах, халача ханашка из ца вохаш хиларах дувцар. Лоархӏаме да, «Дошо Гӏала» яхача фестивала фильмашка, Сийлахь-боккхача Даьймехка тӏем тӏа, иштта таханарча хана латтача тӏем тӏа котало яккхарах дувцаш хилар. Цо таро лургья таханара мах бараш довза, тӏема халонаш го, бӏухой денал, майрал дагалоаттаде, цар сий де», - аьлар, ше моаршал хоатташ, российски кинематографа кулгалхочо.
Цо белгалдир, моллагӏа дола фильм сага уйла тӏаозаш, цо исторически говзала мах хоадабергболаш, нахаца деш дола дийна къамаьл санна хила дезилга.
Режиссёра иштта аьлар, Гӏалгӏайче дӏахьош йола «Дошо Гӏала» яха кинофестиваль къаьстта дола дакъа дӏалоацаш хиларах. Цо белгалдир, Россе моттигашта, кхувш доагӏача ноахалашта, тайп-тайпарча культурашта юкъера бувзам чӏоагӏбара из фестиваль эшаш хилар. Цо иштта таро лу начӏал долча къонача наха шоайла къамаьл де, дагабала, шоай балха говзал екъа. Михалковс дийцар, Гӏалгӏайчен лаьтта хьагойташ да, сага дагалоаттам, гӏулакх дӏахо дӏадахьар, ший овла бовзаш хилар мехка мел лерхӏам болаш да.
Юххера, ший къамаьл чакхдоалаш, цӏихезача кинокультуран говзанчас фестиваль даькъалайийцар, ший программа дика дӏаяхьа цун аьттув хилар ловш.
