«Даьхен лорабой» яхача ганза вай мехкарча филиала керда кулгалхо ва
«Даьхен лорабой» яхача ганза вай мехкарча филиала кулгал деш хургва Абаьданаькъан Ислам. Паччахьалкхен моттиге доал дара болх дика бовзаш, хоамий-аналитически оагӏонцара декхараш кхоачашдар вӏаштӏехьадоалаш саг ва из. «Сердалога» из хоам бу мехкарча Паччахьалкхено.
Кердача хьакимо белгалдечох, ганза балхаца эггара лоархӏамедар бӏухошта, цар дезалашта боаггӏача боараме терко лоаттаяр, деррига гӏулакхаш лерттӏа кхоачашдар да. Къаьстта терко еш белгалдир Абаьданаькъан Ислама цу наьха вахарерча гӏулакхашца, кхоачамбоацарашца дувзаденнараш, тӏема аренашкара цӏабаьхкача бӏухошта меттаотта, болх лохаш новкъостал дар. СВО доакъашхой, цар дезалий хьашташ кхоачашдара тӏехьа лакха терко е еза.
Таханарча денга кхаччалца филиала кулгал деш хинна Оздой Муслим цигара дӏавалар кхыча, лоархӏамеча моттиге болх бе дӏатӏавахарца дувзаденна да. Москверча Гӏалгӏайчен Постпредства кулгалхо волаш къахьегаш хургва из дӏахо. Ше кулгал деш хиннача юкъа, ганза филиала болх ма хулла дикагӏа дӏаоттабе хьожаш, декхараш бехктокхаме кхоачашдеш чакхваьлар из.
