Кердача моттиго хица ӏалашбергба эзараш бола нах
Гӏалгӏайчен Шолжа кхален Оалкама дика дӏахьош да Эса тӏа хий хьалуш йола моттиг хьалъяра дола балхаш, яхаш, дийцар «Сердало» газетага республикан кулгалхочун зарбан болх лелабераша. Из болх баь баьлча, таро хургья ден-бус цигара 100 эзар кубометр хий лоаттаде.
«Из болх дӏаболабе таро хургйолаш дукха къахьийгар Гӏалгӏайчен кулгалхочо Келаматанаькъан Махьмуд-ӏаьлас. Балхаш шо-шоай аргӏагӏа дӏахьоргда 2030 шерга кхаччалца.
Керда хий чулоацаш йола моттиг хьалйича, кхоачам болаш бӏаьш эзараш болча наха хий хургда, цу юкъе я Илдарха-Гӏала, Магӏалбик, Шолже, иштта Шолжеи Магӏалбикеи кхалений бахархой, лакхача лоаман моттигашка - Галашка, Мужеча - баха нах», - аьлар хоамо.
Белгалду, из лоархӏаме гӏишло хьалъеш хиларца цхьана хьадеш да, Гӏалгӏай Республикан доал деча даькъ тӏа кхыдола хица ӏалашо яра балхаш. Из деррига деш да «Коммунальни даькъ тӏара хьал кердадаккхара» яхача федеральни программа чудоагӏаш.
«Дӏадоладаьд Гӏалгӏайчен хица ӏалашо яра доккхий хувцамаш. Бетта шозза сога хоам бу даь даьннача балхех. Мехка из болх мел лоархӏаме ба дувцилга а дац. Ахча арадоаккхаш дукха къахьийгад. Путин Владимира из проект хьаллацарах, вай республике укх массехк шера хица нийслуш хинна кхоачамбоацараш юстардаха таро хургья. Даим хий цахилар бахьан долаш; шахьара, юртий наьха вахара хьалаш чоалхане дерзар. Из моттиг – Гӏалгӏайчен хургдар да», - аьлар Макшарипа Махьмуд-ӏаьлас.
Белгалду, Эса хи тӏа хьалъеш йола хий хьалу моттиг хьакхоллаш я, Россе моттигашка паччахьалкхен гӏишлош хьакхоллара йолча программанна чуйоагӏаш.
