Болх лургба аьнна оапаш бийца, ахча лочкъадаьд вай мехкахочун
Наьсарен кхален полице болхлой интернете гӏолла тийшаболх баь зуламхо лохаш ба тахан. «Сердалога» из хоам МВД болхлошкара бера.
«Россе ОМВД вай мехкарча моттиге латкъа енача яхархочо дийцачох, блогера гӏонча йолаш болх бе аьттув лу ше, аьнна, хоам оттабаьб интернете. «Лаура» я ше аьннача сага из хоам, ший деррига адрес тӏалатташ, юхабайта аьннад шийга. Дӏахо «Лаурас», цун цӏерах банкера 40 эзар сом кредит ийца, из ахча шийна дитад», - йоах ӏаьдала болхлоша.
Тийшаболх лелабераш интернета оагӏонашка гӏолла даггара баржаш латт, хӏаьта тамаш яйтар да вӏалла малашб ца ховча нахах адам тешар, шоай мел дола хӏама царга дӏадувцар. ӏаьдала болхлоша, РФ УК 2-ча дакъа 159 ст. гӏулакх хьадийлла, лохаш я «Лаура».
МВД болхлоша кхайкарал деш латт бахархошка! Оашош леладеча хӏаман уйла еш хила! Ма ӏехадайта шоаш зуламхошка, шоай адрес, карта номераш цхьаннега дӏа ма ювца! Оашош моллагӏа хӏама кхостадалехь, кхыбарашца дагадовла!
