Гӏалгӏайчен сага бокъонех вола викал хьожаргва харжархой бокъонаш лорайой
Гӏалгӏайчен сага бокъонех вола Викал Цӏечой Ибрахӏим вахар республикан хоржамий даькъ тӏа, кийчон болх миштаб хьажа. Тов бетта 18- ча денгара 20-ча денга кхаччалца РФ Паччахьалкхен Думан, республикан халкъа Гуллама депутаташ хоржаш дакъа лоацаш хургба республикан бахархой.
«Цигара хьал миштад а, хоржамий комисси кийча йий а хьежар. Из иштта хьежар наха кхадж тассара оатто луш дола хьалаш вӏашагӏдехкадий, лаьрххӏа йола кабинаш кийчъяьйий, кхадж тассара бокъонаш лораеш йий. Къаьстта техкар дӏа-юха лела ца могаш болча наха кхадж тасса атта хургдола гӏулакх кхоачашдаьдий. Хоамий ӏалашо яр миштад а хьежар: стендаш йий, бюллетенаш яздара харжархошта малагӏа кийчо яьй, комиссе болх мишта вӏашагӏбеллаб. Цига гуш хилар хоржама даькъ тӏара хьал дика долга, кийчо яьлга, эшача гӏирсаца ӏалашо яьлга», - дийцар «Сердало» газетага УПЧ хоамий даькъа болхлоша.
Цул совгӏа, республике болх беш я «бӏайха бувзам» яха телефон 8 (963) 172-42-70, тов бетта 14-ча денгара 17-ча денга кхаччалца (9:00 даьлча денз 17:00 сахьат даллалца); кхадж тоссача дийнахьа тов бетта 18-ча денгара 20 денга кхаччалца- 8:00 даьлча денз, 20:00 сахьат даллалца. Цу номерах наьха таро хургья шоашта новкъадар тахка.
Из деррига сага бокъонаш лораеш, царна аттагӏа хургдолаш деш да. Республике кхадж тосса ди дӏахьоргда нийсхон тӏехьа, къайле йоацаш.
