Унахцӏенон Российски университете бовзийтар вай лорий болх
Унахцӏенон гӏулакхех йолча Российски университете Москве дӏайихьача «Гуйранара консилиум» яхача ӏилман-балхацарча конференце дакъа лоацаш хилар вай мехкара лораш-оториноларингологаш. «Таханара оториноларингологи: ӏилмангара балхага кхоачаш» яхача хьалхаленца дӏахьош бар из боккха болх. Лергашца, къамаргаца, меражаца хулаш долча лазарашта таханарча ханага хьежжа дарба деш хиларах, дийцар кхетачене.
«Сердалога» тахан бенача хоамах, унахцӏенон оагӏонцара дукха хӏама чулоацаш моттиг хилар цох. Риносинусит яхача лазара, иштта лергашца, берашта меражаца хулача лазарашта хетаяь докладаш йийшар доакъашхоша. Геттара хала лоархӏаш долча лазарашта хирургически оагӏонца дарба дар мишта хила деза белгалдир лакха говзал йолча лораша.
Вай мехкара цига баха хилар лакха говзал йола лораш санна, къона болхлой а. Форума спикер волаш къамаьл деш хилар Ужахьанаькъан Къ. цӏерах йолча Берий республикански дарбанче болх беш вола лор-оториноларинголог Хазанаькъан Ибрахӏим.
«Геттара дегӏаденад берий мераж юкъа лазар. Дарба ду цун кепа е бера?» яха дукха хӏама чулаьца йола доклад йийшар цо гулбеннарашта. Гӏалгӏай паччахьалкхен университета студент волча Гезгинаькъан Амина къона тохкамхо волаш ше вӏашагӏбелла болх бовзийтар цига.
Вай мехка амбрози ураотта йолалуча хана, берашта юкъе даржаш долча аллергически ринита хетабаь бар цун болх.
Белгалде деза, иштта лоархӏаме йолча кхетачене вай мехкахой дакъа лоацаш, шоай говзал гучайоаккхаш хилар республиканна лоархӏаме долга.
