Заӏапхой гӏулакхага хьожаш ба ОСФР
Шоай балха тӏа, цӏаьхха, хиннача хатарах заӏапхой хулаш лозаваьча мехкарча шин вахархочоа кердача машиний дӏоагӏаш дӏаделар РФ мехкарча Пенсионни Ганза оагӏон болхлоша.
«Lada» яха машинаш, заӏапхой болча цу наьха дегӏа хьалага хьежжа хувцаш, кулг теха я. Болх беча моттиге хиннача хатарах лозабаьча наьха оагӏув хьаллоацаш, царна гӏо деш гӏулакх да из. Ворхӏ шера уж машинаш лелае аьттув хургба цу наьха. Цул тӏехьагӏа, керда машин хьаэца бокъо йолаш ба, кӏалха хиннар а цунга юсаш я», - йоах тхога бенача хоамо.
Мехкарча ОСФР зарбан болх лелабераша белгалдечох, машин лелаеча юкъа цар доадаьча доагорах дола ахча нийсса ах меттаоттадергда царна, иштта ОСАГО полиса мах а 50% -га кхоачаш ба. Цул совгӏа, СФР оагӏон маьхах цкъа шоай машин дикка кулг тохийташ тоае а аьттув ба цар.
«Балха тӏа заӏапхой хиннача, лораша дегӏа хьал белгалдеш каьхат деннача наха йоагӏаш я уж машинаш. Лорий-вахара оагӏонцарча (МСЭ) экспертизага гӏолла дӏахьош болх ба из», - дийцар тхога мехкарча СФР оагӏонна кулгал деча Йовлой Зубейра.
