«Оагӏой беттара хьехам лу саг» яхача яхьашка котало яьккхар Шолжа-Шахьарерча хьехархочо
Шолжа-Шахьарерча № 9 йолча ишкола кулгалхочун гӏонча йолча Говрой Мадинас «Оагӏой беттара хьехам лу саг» яхача яхьашка котало яьккхар. Из хоам «Сердалога» бера «Бералла наькъаш» яхача Ерригача Россе проекта оагӏонгара.
2025-ча шера тӏеххьарча бетта, лоархӏаме кхетачеш дӏакхухьаш, иштта ерригача Россе дӏахьош болча «Россерча берий Гӏор-Дади» яхача болама юкъе дакъа лоацаш къахьийгар Мадинас. Шахьарерча мэре болхлошта, гӏонча хьалха йолаш открыткаш, иштта совгӏаташ дийкъар бераша. Оагӏой бетта хьехархочо дӏайихьар къахьегама ветеран, РФ дешара оагӏон лоархӏаме болхло, РФ цӏихеза хьехархо хиннача Озанаькъан Султана хетаяь кхетаче.
Иштта из хьалха йолаш, Говрой Бахьаудина лаьрхӏа «Турпала Парта» хьайийллар ишколе. Къаьстта боккха болх дӏабихьаб Мадинас, берий дегашка Даьхенцара безам чӏоагӏбеш. Даьхен лорабой Ден хетабаь бола «Са зӏамигача Даьхен турпалаш» яха суртий гойтам хьабийллар, № 9 йолча ишколе.
Бераша дакъа лаьцар «Тӏом дӏабаьлча, фу хургда тӏаккха?» яхача лекце. Ший болх тӏехдика дӏахьош, ше хьалаьца никъ безаш, лоархӏаш йолча Гирихана Мадинайна, баркал оалаш, грамота елар.
