Гӏалгӏайчен бераш деча керттерча моттиге 75 керда гӏирс бера
Республикански клинически бераш деча центре 75 керда лорий техника ера. Гӏирсий даькъ тӏа керда техника юкъейоаккхаш хилар дувзаденна да «Наьна, бера могашал лораяр» яхача къаман программах. Еррига а лорий моттигашка хьакхача езаш я 236 техника. Уж хьаэцара болх баь баргба оагӏой бутт чакхбалале. Кастлуш ерригача клиника чуйоагӏача дарбанчешка аппаратура хьакхоачаргья.
«Цу юкъе я пехкашка садоахийташ йола аппараташ, укх заман реанимаце даькъ тӏа леладу хӏаьтта хьадаьча берий истолгаш, вахаре лоархӏамегӏа дола дегӏа хьал довзара йола оборудовани. Бераш деча центра хӏара дийнахьа лорий новкъостал ду кхалнаха, хьадаьча берашта. Карарча шера 8 бетта укхаза 3 эзар бер дир, цу юкъе 29 - шола даь бераш, цкъа кхо бер цхьана а дир. Ер шу дӏадоладелча денз, говзанчаша 1066 операци дӏайихьар, царех 13 керда хьадаьча берашта. Центре болх беш 150 лор ва. Цига иштта «Наьна ишкол» я», - аьлар «Сердало» газетага Гӏалгӏайчен Паччахьалкхене.
Таханарча дено дӏадеххача беса гӏирсаш хиларо лорий болхлошта хьалхашка керда таронаш хьакхолл дӏахо дарба дара. Лорий таро хургья юххьанца долаш дола лазараш гучадаха, царна нийса дарба де. Из накъадоалаш да дарбан хьал кердача боарам тӏа даккхара, хургболча ноаной, бераш даьрий, берий могашал лораяра, цу юкъе ха йоацаш даь бераш а долаш.
