«Зарница 2.0» йолаш, шоай начӏал гойташ хилар Магасера Хьалхарбараш
«Зарница 2.0» яхача Ерригача Россе тӏема ловзаре шоай начӏал гойташ хилар Магасера «Хьалхарбарий болам» яхача оагӏон доакъашхой. Из хоам «Сердалога» бир цу моттигера.
«Мехкарча тайп-тайпарча дешара моттигашкара доакъашхой бар Магасерча стадиона тӏа гулбеннараш. Тоабан юкъе болх бе хар, моллагӏча хӏаман духьала кийча хилар, лаьрхӏачунга кхача гӏерташ къахьегар гойта дезаш бар уж.
Зӏамагӏабарашта юкъе толашагӏа ба аьнна белгалбир СОШ № 2 тоабан доакъашхой. Шоллагӏча лагӏа тӏа дешара Керттера Моттига доакъашхой эттар. Юкъерча ханага кхаьчарашта юкъе эггара лакхерча лагӏа тӏа эттар Магасерча Лицей-берий беша дешархой. Шоллагӏча, кхоалагӏча моттиге эттар «Марем» гимнази, «Ишкол - берий беш».
Боккхагӏбарашта юкъе белгалъяьлар дешара Керттера Моттиг, дото майдилг яьккхар Магасерча СОШ № 2, хӏаьта кхоалагӏча моттиге Лицей-берий беша тоаба эттар», - йоах тхога бенача хоамо.
«Котбаьннараш, доакъашхой даькъалабувц вай тахан дег тӏара! Аьттув болаш хилба цар никъ дӏахо а!» - белгалдир «Хьалхарбарий болам» яхача оагӏон доакъашхочо Налганаькъан Рамзана.
