2019-ча шера денз, 50 гаргга ишкол хьалъяьй вай мехка
2019-ча шера денз; «Дешар», «Демографи» яхача къаман проекташка гӏолла боккха болх дӏахьош 25 000 эзар совгӏа дешархо тӏаэцаргвола 48 ишкол хьалъяьй республике. Из хоам «Сердалога» бир мехкадаь зарбан болх лелабераша.
«Юрташкара дешара оагӏонцара хьал меттадоаладар керттерча декхарех да тахан. Вай берий дешара хьал боаггӏача боараме хилийта хьожаш, доккхий хувцамаш деш, тӏатеӏӏа къахьегаргда мехка», - белгалдир вай мехкадас Келаматанаькъан Махьмуд-ӏаьлас. 2026-ча шера Гӏажарий-Юрта, Пхьилекъонгий-Юрта, Галашка, Кердача Реданте йиъ ишкол хьалъергья. 1600 совгӏа берашта моттигаш лургья цу гӏулакхо, тахан геттара дукха бераш долаш йиза латтача ишколашта паргӏато луш болх ба из. Иштта вай мехка боккха болх дӏахьош, тоаеш латт къаьнара ишколаш а.
Укх шера 4 берий беш, Магӏалбикера № 1 йола гимнази, политехнически оала колледж тоаеш боккха болх чакхбоаккхаргба. Федеральни, моттигера проекташка гӏолла дӏахьош ба из беркате болх. Иштта тахан вай мехка 4 000 совгӏа болх бе керда моттигаш я дешара оагӏонца. Шоллагӏча сменах дешаш хилар юхатеттад цу гӏулакха, харцар кхерам бола, тишъенна ишколаш а кӏезигагӏа я мехка. Таханарча ханага хьежжа тоаяь хургья Гӏажарий-Юртара, Пхьилекъонгий-Юртара, Кердача Редантера, Галашкара ишколаш. Хьехархой, берий дегашта боккха тоам беш гӏулакх хургда цох. Цӏенача, хозача классаша наӏараш хьаелларгья уж тӏаэцаш. Сийрда кабинеташ, йоккха спортзалаш, тайп-тайпара кружокаш йолаш хургья керда ишколаш. Боккха толам ба ала дезаш дика да из вай мехка!
