ГӏалгӀайчен Ӏаьдал хьалхарча аргӀагӏа хьож СВО бӀухой, цар дезалаш хьаллацарга
ГӏалгӀайчен кулгалхочо дӀайихьар «Даьхен лорабой» ганза моттигерча филиала кхетаче, яхаш, хоам бу «Сердало» газетага мехка кулгалхочун зарбан болх лелабераша.
«Ганз хьакхеллай 2023 шера Россе Президента тӀадиллача декхарах, цо кхоачашду лоархӀаме паччахьалкхен декхар – тӀема операци дӀахьош барашта, цар дезалашта юридически, лорий, психологически новкъостал дар. 2025 шу дӀадоладелча денз, укхаза хьаденад 1 600 дехар. Наьха дехараш да тайп-тайпара: лаьтта дезараш, шоашта доагӀаш дола ахчаш хьаэцара новкъостал дехараш, тӀема-лорий комиссе чакхбоалаш новкъостал дезараш, иштта тӀема ветерана цӀи чӀоагӀъяра каьхаташ доахаш гӀо эшараш, психологически новкъостал дезараш. Хӏара дехара тӀехьа – хоадам боллаш вахара хьал да, цо дӀадех теркам беш, бехктокхаме хилар», - аьлар ГӀР кулгалхочо Келаматанаькъан Махьмуд-Ӏаьлас.
Цо иштта мах оттабир говзанчий балха, къамаьл дир болхлошца, дехараш даьча нахаца. Къаьстта кхетаче дӀайихьар мехка филиала кулгалхочунца, вице-премьераца, цунна чубоагӀача министрашца, доал деча даькъ тӀарча Ӏаьдала викалашца.
Макшарипа Махьмуд-Ӏаьлас цӀаькха а белгалдир; СВО доакъашхой, цар дезалаш массайолча оагӀорахьара хьаллоацаш хилар республикан кулгалхошта эггара керттера хаттар долга. Цу юкъе Махьмуд-ӏаьлас белгалдир ганза даима бувзам хила безилга доал деча даькъ тӀарча Ӏаьдалца, министерствошца, тайп-тайпарча паччахьалкхен моттигашца. Деш дола новкъостал дӀакхоачаш хила деза ГӏалгӀай Республикан массайолча юртий, шахьарий бахархошка, кхайкарал тӀаэцар, ха ца йоаеш, сиха кхоачашдеш хила деза.
Иштта дийцар ветеранашта лорий дарба дарах. Наьсарен кхален Сурхо тӀарча ветераний ЦӏагӀа тахан дика хьалаш да меттаоттара, къахьегаш ба лакха говзал йола, бехктокхаме лораш, йоагӀаш йола ӏалашо яьй лорий новкъостала моттигашта. Карарча хана дарба деш бола нах дукхагӀа хулаш боагӀа.
«Белгалдаккха лов, ганза моттигерча филиало балха декхараш кхоачашдара керттера терко лоаттаеш хилар. Иштта цунна тӀадиллад хӏама кхоачашдар, доал деча даькъ тӀарча Ӏаьдала кхайкарал чӀоагӀагӀа теркалдар. Вай бӀухой, цар дезалаш хьаллацар – из даим дӀахьош бола болх ба. Из декхар оттадаьд Россе Президента. Дукха ха йоацаш паччахьалкхен кулгалхочунца тха къамаьл долаш, оаха дийцар СВО бӀухой, цар дезалаш хьаллацарах», - аьлар Келаматанаькъан Махьмуд-Ӏаьлас.
