«Дикача наьха клубо» ӏунал дераш бахар ГӏалгӀайчен МКЖР экскурсе
ГӏалгӀайчен къам мехкагӀдаккхара дагалоаттама Мемориала комплексе дӀабихьар «Хьакхоачаш йола музей» яха болам, из тӀахьехаш я культуран вахаре хӀара сага дакъа лацара, из лоархӀаме хилар белгал а деш. Музея хьаьший бар «Дикача наьха Клуб» яхача дика гӀулакхаш леладеча ганза доал деш бола зӀамигабараш. Кхетаче сийрда, тайп-тайпарча нахага ший хьалаш дӀакхоачаш хилара масал гойташ яр.
«Берашта лаьрхӀа вӀашагӀъеллаяр бӀарчча экскурси, цунна чуйоагӀаш яр еррига музея экспозицеш. Къонача хьаьший уйла тӀайодар исторен, культуран оагӀонашта. Цар боккхача безамца ладувгӏар экскурси дӀахьош волчо дувцача исторега. Из болх вӀашагӀбелларашта доккха совгӀат хилар бераш гӏаддахарах», - аьлар «Сердало» газетага ГӏалгӀайчен МКЖР.
Кхетачен программа музея гойтам бовзийтара оагӀонца чакхйоалаш яцар. Шоаш цу музее баха хилар царна геттара дика дагадоагӀаш хилийтара, берашта кийчдаьдар совгӀаташ. Хӏаранена мерзача хӀамай совгӀат делар, иштта ГӏалгӀайчен исторех дола дувцараш тӀадола книжка а делар. Цо таро елар берашта тӀехьара тӀа довза хьамсарча мехка культуран мах бараш.
