Полице болхлоша эша мухь бахьийтар российски бӀухошта
ГӏалгӀай Республикан МВД даькъ тӀа, укх деношка гуманитарни мухь кийчбир СВО дакъа лоацарашта дӀабахьийта, яхаш, дийцар «Сердало» газетага республикан бокъонаш лораераша.
«Бокъонаш лораераша Россе герзашцарча низий Министерствон 503-ча бӀун дехарах, тӀема декхараш кхоачашдара эшаш бола мухь дӀабахьийта кийчбир: бензинаца леладу генератораш, рацеш, «Булат» яха дрон йоагӀий хоам беш дола гӀирсаш, йӀовхал лоатторгаш, кхоллараш», - аьлар хоамо.
Вай Даьхе лораеш латтарашта керттера эшар - мухь ший ханнахьа дӏа кхачийтар. «Халкъа Фронта» моттигерча даькъа низаца, из дӀакхоачаргба Запорожски оагӀон тӀа.
«Вай мехкахоша-кагийча наха тахан сица лораю Даьхе, кхыча ерригача моттигий бӀухошца цхьана. Вайна дика ховш да, котало яккхара къахьега деза хьалхарча мугӀарашка санна, цун юкъамоттиге а. Цудухьа вай, Российски Федераце эзараш болча бахархоша санна, хьаллоац бӀухой цу тайпарча гуманитарни новкъосталца. Аз тахан баркал оал цу хьала юстара боацача наха. Цар гаргайоалаю котало, царех хӀаравар турпал ва. Шоай зӀамига Даьхе дагайоха бахьан да царна гуманитарни новкъосталца. Вай йоаккхаргья котало, моастагӀа эшавергва. Цӏаькхаза баркал хилда новкъостал гулдеш дакъа лаьцарашта», - аьлар ГӏалгӀай Республике гӀолла волча чурча гӀулакхий Министра Котов Владимира, цу болама лоархӀамах дувцаш.
ГӏалгӀай Республике гӀолла йолча МВД ветераний Кхела кулгалхочо Котанаькъан Мухьмад-Сале аьлар, тахан тӀема мугӀарашка латтараш шоай гаргара, кхоачара нах ба, цудухьа бокъонаш лораерий ветеранаша цу тайпара новкъостал гулдеча хана даим новкъостал ду, денал долча российски бӀухошта.
Цӏаькха а белгалду, СВО дӏайолаеннача хана денз,вай мехко массайолча оагӀорахьара хьаллоац бӀухой, цар дезал. Республико дукхаза а даьд гуманитарни новкъостал, вай мохк лорабеш латтача турпалхошта дӏакхахьийтаб из мухь. Из болх дӀахо дӀахьош а ба.
