Наркотикаш йохка гӏийртар дӏалаьцар мехкарча полице болхлоша
«Корта бохабеча маларца бувзам боаца тӏехье» яха рейд дӏаяхьа «Пхьилекъонгий-Юрт – Ачалкхе» яхача наькъ тӏа арабаьннача мехкарча полице болхлоша соцайир «ВАЗ-211440» яха машин. Полице болхлоша теркалдир машин лоаллаш ваьгӏар цхьан тайпара лертӏа воацилга. Машина чу ваьгӏа шоллагӏвар а наркотик дегӏаца йолча сага хьал долаш вар.
«Машин лоаллаш ваьгӏача сага чухьажа эттар полице болхлой. Цун тӏайийхача джинсай кисара, 1,48 грамм хиллал дола мефедрон яха дохьаж чудоаллаш, турбилга хьисапе хьоарчадаь туман каьхат корадир царна. Хӏаьта машина чу хьажа эттача МВД болхлошта гучаяьлар тайп-тайпара цӏераш йола наркотически хӏамаш (изолентой, термоусадка, «Фенибут-Лект» яха молхаш, иштта кхыяраш а).
«Sobranӏe» яхача машина чу гурмат йоаллар, геттара чӏоагӏа хьоарчаяь 40, 76 грамм мефедрон чуйоаллаш. ЭКЦ МВД дӏабихьача тохкамах, цу сагагара хьадаьккха мефедрон яха дохьаж 42, 24 грамм дар. Тохкама болхлоша белгалдечох, из деррига дохьаж дӏа-хьа доаржаде дезаш хиннав из мехка, бакъда Даьла къахетамца кхийнадац, полице болхлоша соцаварах»,- йоах «Сердалога» МВД болхлошкара бенача хоамо.
Цу сага духьала гӏулакх хьадийллад ӏаьдала болхлоша РФ УК 3-ча даькъа 30-ча ст. п. «г»; 4-ча даькъа 228.1 ст. (боккхача боарамца наркотикаш йоаржае хьажар). Хӏаьта машина чу ваьгӏачунна, духьала полице болхлошта духьале ярах, административни протокол оттадир (РФ УК ст.19.3). Наьсарерча ИВС ӏочувигар из ӏаьдало.
