Гӏалгӏайчен полице лохаш ва, иномарка йохкаргья аьнна зуламхо
Гӏалгӏайчен Илдарха-Гӏалан полице лохаш ва онлайн-эцара кепах иномарка йохкаргья аьнна кхалсаг Ӏехаяь зуламхо, яхаш, дувц «Сердало» газетага ГӀР бокъонаш лораераша.
«Илдарха-Гӏалий тӏа гӏолла йолча Россе ОМВД ха дара даькъ тӏа ера моттигера яхархо, лоткъам бахьаш. Цо яхачох, бувзама оагӏонашка гӏолла цун къамаьл хилар 2012 шера арахийца йола «КИА Церато» яха автомобиль йохкача сагаца, цо цун чота тӏа дӏадахьийтар 110 эзар сом», - йоах тхогарча хоамо.
Бакъда царна юкъе чӏоагӏъяь ха яьлча а; цул тӏехьагӏа бутт кхы баьлча а; из автомобиль цу кхалсагага хьакхачанзар; «йохкаш хиннар», мичав ца ховш, вайна дӏаваьлар.
Илдарха-Гӏалий тӏа гӏолла йолча Россе ОМВД тохкама даькъо из бахьан долаш зуламхочунна духьала гӏулакх хьадийллар. Теша лов, бокъонаш лораераша из зуламхо хьалохаргва, аьнна, цунна доагӏаш дола таӏазар дергда законо дӏадехача боарамах.
Гӏалгӏай Республикан МВД хьалхадоаккх бахархошта: хӏама нахалдоаккхаш кхайкадарах, телефон тохарах, каьхатех малаш ба ца ховча нахах ма теша, цар шоашта пайда беш мара хӏама дергдоацилга кхетадеш хила. Даим фийла хила, цу тайпара моттиг нийсъелча.
