Гӏалгӏайчен полици тохкаш я, ялх саг лозавеш нийсденна хатар
Сийсара 22:00 сахьат даьннача хана, Илдарха-Гӏала-Наьсаре оалача наькъ тӏа, машинаш вӏашкакхийтта, хатар нийсделар. Пхьилекъонгий-Юрта ӏочуоттача, «Лада Приора» автомобила водитела ший машина чутехар хьалха йодача «ВАЗ-2115». Из бахьан долаш, цу машина чу ваьгӏа массехкк саг, човнаш хинна, сихача новкъостала тоабо Наьсарерча Гӏалгӏай республикан клинически дарбанче хьалчувигар. Дарбанче кхаьчараш пхи саг вар, царна юкъе шин машина водителаш болаш. Царех цхьан машина чу яьгӏа кхувш йоагӏа йиӏиг республикан берий клинически дарбанче дӏайигар. Лораша эшаш дола гӏо даьчул тӏехьагӏа, кхо саг чувахийтар, дӏахо царна амбулаторе дарба дергда, яхаш, хоам бу «Сердало» газетага Гӏалгӏайчен Россе МВД зарбан болх лелабераша.
«Машинаш вӏашкакхийттача моттиге сиха кхаьчар тохкама-хьем боаца полице тоаба. Цо белгалдир, шаккхе а водитель машин лелаяра бокъо йоацаш волга. Цул совгӏа, ДТП яра бехкевар Наьсаре гӏолла йолча Россе ОМВД тӏахьожам лоаттабеш а ва. 1996 шера из маӏа саг хьалха суд яь хиннав 1 д. 166 ст. (бокъо йоацаш машин лелаяр), 3 д. 158 ст. (къоал), 1 д. 234 ст. (наркотикаш лелаяр). Хьалхагӏа из ийсазза Россе КоАп 6.9 статьях (наркотикаш тохар//малар, лорашта тӏаваха цатигар), диазза 20.1 статьях (зӏамига йовсарал леладар) бехке ваь хиннав», - аьлар тхоца къамаьл деш хинначо.
Хӏанз из чувеллав Наьсарен кхале гӏолла йолча Россе МВД. Зулам леладарах дола цун гӏулакх хьадийллад пхе статьях.
Административни бехк бергба шоллагӏча водитела а, цунга водитела каьхат цахиларах. Йохаяь шаккхе машин цу моттигера дӏайигар Наьсарерча цу гӏулакха лаьрхӏача майдан тӏа.
Из гӏулакх дӏахо тохкаш да.
