ГӏалгӀайчен массазарча викала баркал аьлар, «Аьрзи» батальон хьаллацарах
ДНР, ЛНР Запорожски, Херсонски областашкарча массазарча викала Фаьрганаькъан М. шийгара, Лугански Халкъа Республике йолча «Аьрзи» яхача батальона цӀерах баркал аьлар Волгоградски областе ГӏалгӀайчен викал волча Мержой Г., иштта Волгоградски областа Михайловски кхален бизнес-юкъарлон викала Клупов В. цар бӀухой хьаллацарах.
«Тхона лоархӀаме да цар даь новкъостал, цо таро елар тхоай тӀема моттиг чӀоагӀъе, тӀема декхараш тешшаме кхоачашде. Оаха хам бу цу тайпарча новкъостала, иштта тхоашта гӀо де кийча хилара. Цо низ чуболийт кердача толамашка кхачара», - аьлар «Сердало» газетага Фаьрганаькъан М.
Белгалду, «Аьрзи» яхача лаьрххӀача батальона чубоагӀаш ба ГӏалгӀайчен цӀихезача «Акха дивизен» тӀехьенах бола бӀухой. Исторе оагӀонашка дика бовзаш ба шоай деналца, майралца моастагӀчунна духьаллаташ хинна, дӀаяхача тӀема ханашка белгалбаьнна гӀалгӀай дошлой цӀихеза бӀу. Из, дӀаяхача ханашкара истори, бувзам лелабар хинна Ӏац. Цо лакха лоаттабу таханарча заман бӀухой мах.
ЦӀи «Аьрзи», ший къаьстта белгало йолаш я. Бӏаь шераш дӀадахачул тӀехьагӀа а йиц ца луш, лоаттаю гӀалгӀай бӀун карагӏдаьннарий исторе оагӀонаш, царна амар кхоачашде хар, тӀема гӀулакха кийча хилар, тӀема даькъ тӀа новкъост хьаллоацаш хилар, из деррига чудоагӀа цун.
Цул совгӀа, «Аьрзи» батальон къайлагӀа болча этнически бӏухоех латташ яц, из цӀена, къамашта юкъера подразделени я. Укхаза, оагӏох оагӏув теха, латт тайп-тайпарча къамий, бе-бе ди лелабеш бола викалаш, цхьа маӀан долаш да цар латтар – Даьхен хьашташ лорадар. Тайп-тайпара культураш, Ӏадаташ чудоагӀаш да цхьан тӀема тоабанна, цига доккхал деш тӀаэц хӀара сага оамал, професси, гӀулакха тешшаме из хилар.
