Гӏалгӏайчен массазарча викалаша сий дир, го баьча Ленинграде денал гойтарий
Ленинградски областа губернатора Дрозденко Александра, Ленинграда моастагӏчо баь го бохабаь 82 шу дузаш хилара хетаяьча кхетачене, дакъа лаца бийхар Къилбаседа-Гӏибухен федеральни куран тӏара Гӏалгӏайчен викал Овшанаькъан Муслим, Новгородски областа викал Бохтаранаькъан Къамбулат. 2025 шера наджгоанцхой бетта хинна дагалоаттама денош исторена лоархӏаме да, цудухьа го баьча хана Ленинград лораеш лаьттарашта, цун бахархошта дег тӏара баркал алара еш кхетаче яр из. 872 дийнахьа (1941 шера тов бетта 8-ча денгара 1944 шера наджгоанцхой бетта 22-ча денга кхаччалца) Ленинграда моастагӏчо го баь лаьтта ха цаӏ эггара халагӏа, турпала оагӏонаш гойташ хиннарех я, Сийлахь-боккха Даьймехка тӏом латташ.
Дагалоаттама кхетаченаш дӏаяхьара чудоагӏаш дар викалаш Зайцево яхача юрта, Мемориала комплексе баха хилар. Комплекс хьалъяьй 2024 шера, Россе Президента Владимир Путина тӏадиллача декхарах. Из яьй монумента ансамбла кепара. Цун чувоалаш йола моттиг 47 метр, тӏем тӏа бейнарий дагалоаттам гойташ дола улг да. Цига дакъа лоацаш хилар РФ Президента администраце кулгалхочун гӏонча, Ленинградски областа кулгалхой, моттигашкарча, федеральни ӏаьдалий викалаш, иштта дипломатически корпус. Кхыча лаьрххӏача викалашца цхьана, Ленинград лораеш лаьттарий, бахархой сий деш зизаш доахкаш хилар Гӏалгӏайчен викалаш», - аьлар «Сердало» газетага.
Кхетаче дӏаяхьаро цӏаькха а хьагойтар, Россе халкъа цхьоагӏо, юкъара истори лорадеш, Ленинграда бахархой, из лораеш лаьттарий сий деш хилар. Лоархӏаме да моттигашта юкъера бувзам чӏоагӏлуш хилар, иштта тӏехьа тӏадоагӏача ноахалга цу исторе бакъдар дӏалуш хилар.
