УПЧ тохкам баьчул тӏехьагӏа, ца доагӏаш газах хьатеха ахча заӏапхочун тӏера ӏодаьккхар
Заӏапхо волча мехкахочун гӏулакха оарцагӏваьлар, сага бокъонех вола викал. Цу сага дийцар, шийна боарамал дукхагӏа газах декхар оттадаь хилар.
Гӏо дехаш тӏавера из УПЧ. «Сердалога» бенача хоамах, укх шерарча бӏаьстен кхоалагӏча бетта, заӏапхо республикал арахьа волча хана, 2031-ча шерга кхаччалца болх бе йиш йолаш хинна газа боарам хьахьокха гӏирс пайдана бац, аьнна, акт оттаяьй газа оагӏонцарча болхлоша.
Цар оттадаь бахьан да, цу гӏирса тӏакхача аьттув болаш цахилар, бакъда из саг мехка хиннавоацилга тешал деш каьхат да. Цӏен доазонга хьожаш, «нормативах» оттадаьд цар заӏапхочун декхар. 128 кв.м лаьрхӏад цар ахча, хӏаьта цу сага цӏа 117 кв .м мара дац.
Белгалде деза, газах хьатеха ахча хьагойташ бола гӏирс, цун болх хувцаш, кулг теха боацилга. Цу сага бокъонаш меттаоттае, аьнна, фусамех йолча Паччахьалкхен моттиге каьхат яздаьд сага бокъонех волча викала.
ООО «Газпром межрегионгаз Наьсаре» яхача оагӏонца дӏабихьача тохкамо хьагойтар заӏапхочо мел яхар кӏал кӏийле йолаш долга.
Гучадаьккхар, цу сага декхар ӏотӏаяздеш бола болх харцахьа, цун бокъонаш толхаеш дӏабихьалга. Кхоачамбоацараш юстардаха, аьнна, тӏадиллар цигарча болхлошта.
