Гуйран цӏай дӏадихьар Яндарерча культуран Цӏагӏа
Яндарерча культуран Цӏагӏа тахан сийрда литературан-ашарий «Камаьрша гуйре: ялат чуэца ха» яха оагӏув вӏашагӏъеллар. Из хетаяь яр «ӏалама беркат» яхача массахана дӏахьош долча цӏайна. Из вӏашагӏделлараша ашарашка, поэзега, берий кхолламга гӏолла хозача кепара гойтар гуйран ха.
«Цӏайна программа дӏахьош яр культуран Цӏен исбахьаллен кулгалхо Йовлой Мадина. Ший лакхача балха говзалца цо гулбеннарашта боккъонцахьа дола цӏай дир. Кхетачене го йиш яр ший мехкацара безам, цун ӏадаташ лоархӏаш хилар», - аьлар «Сердало» газетага культуан салоӏама моттиге.
Сцена тӏара хозаш яр моттигерча поэтий байташ, цар гӏалгӏай гуйран хозалах даьха иллеш, иштта моттигерча ишкола дешархоша а шоашкара дакъа юкъедера цига. Бераш боккхача безамца гойтар шоай начӏал, иллеш даьхар.
Къаьстта хьаьший а, цӏайна доакъашхой а терко тӏаозаш бар культуран Цӏагӏа боаржабаь гойтам. Цига дар хьувкъама даараш, уж шоай кулгашца кийчдаьдар юртарча бахархоша, шоай коарча лаьттан даькъ тӏа хьалкхедаьдар. Цул совгӏа, цар йир тайп-тайпара бесаш дола гуйран хоза хӏамаш, дукха яр къонача начӏал долча бераша ӏалама гӏирсех яь уж. Цо хьагойтар лаьттан даькъ тӏара мел пайда эца йиш я, иштта гуйран беркат, цун хозале.
Из цӏай дӏахьош хиларо бахархой культуран вахаре доккха дакъа дӏалаьцар. Литературан - ашарий кхетачено паргӏато царна яларал совгӏа, хьалхадаьккхар ӏалам лорадеш, къахьегама тӏера волаш хила везилга хӏара саг.
