СВО турпал Гарданаькъан Акромат волча госпитале, баха хилар вай мехкара викалаш
Ростоверча тӏема госпитале дарба дӏахьош вола Лаьрххӏача операце доакъашхо Гарданаькъан Акромат волча баха хилар, ЮФО Гӏалгӏайчен массазара викалаш. Геттара чӏоагӏа хиннача човнех аьрдига кулг дӏадаьккхад цун, гӏо дехаш вай мехкадаьга йистхилар из цул тӏехьагӏа. Мехкадас Келаматанаькъан Махьмуд-Ӏаьлас ЮФО викалашта тӏадиллар; ӏалаьмате сиха из волча дӏакхача, аьнна.
«Гӏалгӏайчен массазара викалаш Акромат волча дарбанче баха, цунца къамаьл деш хилар. Цигара араваьнначул тӏехьагӏа, дӏахо кхы а дикка меттаотташ кхоачашде дезарех дийцар цар. Москверча протезаш хьаеча моттиге, цунна дикагӏа йола протез хьаяйта лаьрхӏа, соцам бир цар. Цул совгӏа, Россе Президента яьча чӏоагӏонца 4 миллион сом ахча хьадоагӏа цунна ӏаьдалгара. Мехкада ше гӏо де лаьрхӏа ва Акромата, из цигара цӏавеча. Цунна эшаш мел долча хӏаман терко еш, хьашташ кхоачашде хьожаш хургба мехка», - дийцар «Сердалога» мехкадаь зарбан болх лелабераша.
Тахан Акромата эггара лоархӏамедар - дегӏа дикка низ ӏоабар, халача човнех меттавар. Дикка ха еза цу гӏулакха, хӏаьта цу юкъа цхьаь хургвац из, цох дог лазаш йола Гӏалгӏайче хургья цунца. Даьхен хӏама лорадеш тӏема аренашка лаьттача сага оагӏув хьаллаца, гӏо де кийча ба тахан берригаш.
