Гӏалгӏайчен викалаш дакъа лоацаш ба мехка юртбоахама кхетаче
Москве дӏаболабелар 28-гӏа Российски юртбоахама «Дошо гуйре» яха гойтам. Из мехка юртбоахама даькъ тӏа лоархӏаме, хӏара шера дӏахьош йола кхетаче я. Карарча шера йоккха кхетаче дӏахьош я «Тимирязева Центре» дешара-гойтама майдан тӏа, из хургья ардара бетта 10-ча денга кхаччалца. Цу кхетаче къаьстта терко тӏайохийт мехкашта юкъерча бувзама, шоайла балха говзал эцара. Цига дика дакъа лоацаш ва Гӏалгӏайчен юртбоахама, кхачан министр Гаьгенаькъан Мухьмад, иштта республикан боахамий кхелахой.
Гӏалгӏайчен викалашта йовзаргья цу даькъ тӏара керда таронаш, уж хул тематически майдаш дӏахьоча, иштта цар дакъа лоац шоайла къамаьл хотталуш. Царна из дика таро я, юртбоахама лоархӏаме хаттараш дувцара, шоайла бувзам лелабара, гӏирсаш хьакхоллача говзанчашца, уж республикан юртбоахама даькъ тӏа леладара царгара балха говзал эцара.
Кхетаче дӏахьош рынка керттера хьал леладераш, ӏаьдала викалаш, берригача мехкара ӏилманхой цхьан майдан тӏа къоастадеш хул технологически хьалхале, иштта продукци арахецара хьал дегӏадоаладар.
Шоай толамаш цига гойт итташ российски моттигаша, минеральни молхаш арахийцараша, лакха технологеш йола оборудовани хьакхоллараша, фуна боахамаш, хьалхале лелаеча юртбоахамий предприятеша.
Гойтамо чулоац вай заман АПК керттера оагӏонаш - хьалхале лелаеча юртбоахама техника, фу леладаргара дӏадоладенна, фермерий болх лелабара таьрахьий хьалаш юкъедахарга, кердача ветеринарни препараташка, биотехнологешка кхаччалца.
Толамаш гойтарал совгӏа, цу гойтаме дика программа хургья, цунна чудоагӏа итташ «герга истолаш», семинараш, дӏахо дергдар белгалдара сессеш. Цига дакъа лоацаш хургба хьалхале лелаю кхелахой, Россе юртбоахама Министерствон кулгалхой. Кхетачен хьаьший таро хургья мехка продукци арахецача таронашта мах оттабе, иштта хьайбаш леладара лаьрххӏача моттигашка баха, интерактивни даькъ тӏа, йоккхача гастрономически фестивале хила. Цига хургья Россе массайолча моттигашкарча фермерий эггара дикагӏа йола продукци.
