Гӏажарий-Юртара ДК викалаша халкъашта юкъерча кхетаче толамаш даьхар
Гӏажарий-Юртара культуран Цӏа дакъа лоацаш хилар «Российский оагӏув. Коталон маьтсела бутт» яхача иллиалархой говзала даькъ тӏа. Йоккха культуран проект дӏахьош яр онлайн-кепара, цо таро елар артисташта лакха говзал йолча кхелахошта шоай начӏал гойта.
«Дика толам баьккхар цига культуран Цӏен иллиалархочо Эльгакаевгӏар Седас, цо дӏааьлар «Гӏарагӏураш» яха илли, цох эггара лакхара балл оттайир доакъашхошта юкъе, цо даьккхар 1-ча лоархӏама лауреата диплом. Иштта дика кийчо яь хилар гойтар иллиалархой кружока доакъашхочо, хьехамчас ӏоахарганаькъан Хадизас кулгал деш.
Маькенаькъан Хьавас, Бузуртанаькъан Альбинас кхетаче гойтар «Нана, хьежа…» яха композици, кхелахоша царна делар 3-гӏа лоархӏам бола дипломаш», - аьлар «Сердало» газетага Гӏажарий-Юртарча культуран Цӏен кулгалхочо Йовлой Ювсапа.
Гӏажарий-Юртарча бахархой толам цаховш нийсбеннабац. Моттигерча культуран-салоӏама моттиго дика дегӏабоалабу халкъа кхоллам, иштта таро лу къонача начӏал дарашта шоаш дӏабовзийта.
