Вай къаманна чӏоагӏа лоархӏаме да хьатӏадоагӏаш дола хоржамаш
Гурахьа хила дезаш дола Паччахьалкхен Думан, моттигерча Парламента депутатий хоржамаш вай республике чӏоагӏа лоархӏаме да. Из хоам «Сердалога» бир мехкадаь зарбан болх лелабераша.
«Тов бетта 20-ча дийнахьа РФ Федеральни Гуллама Паччахьалкхен Думан хоржамаш дӏадахьарах йолча чӏоагӏон кулг яздир тахан Россе Президента Путин Владимира.
Вай къаман къаьстта лоархӏаме да хила деза хоржамаш. РФ Паччахьалкхен Думан, Гӏалгӏай Республикан Халкъа Гуллама депутаташ харжа безаш ба мехкахой.
Цул совгӏа, беррига болх чакхбаьлча, РФ Федеральни Гуллама Федеральни Кхеле хургбола вай мехкахой бовзийтаргба», - аьлар вай мехкадас Келаматанаькъан Махьмуд-ӏаьлас, цу лоархӏамеча гӏулакхах дувцаш. Республикан кулгалхочо белгалдир, хоржамашцара болх РФ бокъоно оттадаьча тайпара, лакхача боараме дӏабахьа безилга.
Иштта вай Мехкадас хьоахадир, федеральни оагӏонца вай къаман гӏулакхаш, кхоачамбоацараш боаггӏача боараме кхоачашдергдола, мехка беркате хургбола нах харжара болх бахархоша дикка хьаллоацаргхиларах дог тийша ва ше, аьнна.
