Хоржамашка дакъа лоацача бахархой бокъонаш лораярах; дийцар мехкарча премьер-министра, СПЧ викала
Цӏихезача, сага бокъонаш лораярах волча викалца Брод Александраца кхетаче дӏахьош хилар вай мехкара премьер-министр Сластенин Владимир. Балхацарча гӏулакхашта республике вена ва сага бокъонех йолча президентски Совета доакъашхо.
«Мехкарча Юкъарча палата доакъашхошца, РФ Паччахьалкхен Думан, Халкъа Гуллама хоржамашка юкъарлон оагӏонгахьара тӏахьожарашца кхетаче дӏайихьар сага бокъонех волча викала. Тов бетта хургдолча хоржамий Цаӏ долча денга кийчо ярах дийцар цар», - йоах «Сердалога» мехкарча Паччахьалкхера бенача хоамо.
Хоржамаш боаггӏача боараме, деррига лорадеш дӏахьоргдолаш, шоаш яьча кийчонах дийцар Брод Александрага Сластенин Владимира. СПЧ доакъашхочунцарча къамаьла юкъе, хоржамий моттигаш видеогойтам, иштта кхыдараш долаш кийча йолга, ӏаьдала болхлоша, хьакимаша вӏаший бувзаме болаш из болх лорабелга, белгалдир премьер-министра.
Иштта цу кхетаче теркалдир, паччахьалкхен моттигаша наьха бокъонаш лораярах болча оагӏонца тӏалаттача дехарашта терко еш, кхоачашдаьраш белгалдеш, болх дӏабахьа безилга.
