Гӏалгӏайчен премьер-министра нах тӏаийцар
Гӏалгӏайчен Паччахьалкхен Председатела Сластенин Владимира нах тӏаийцар, из хьежар республикан пхе дехарга. Хаттараш тохкаш дакъа лоацаш хилар министерствай, боахамий кулгалхой. Хӏара хаттарах доагӏаш дола жоп хьакъоастадир, дӏахо из тахка лаьрхӏар. Дукхагӏа дола хаттараш дувзаденна дар унахцӏенонца, вахара новкъосталца. Цул совгӏа, наха хьалъайдир наькъий кхерамзлен хаттараш, берий бешамашта, спорта терко яра дош а дийцар. Республикан Паччахьалкхено «Сердало» газетага ма аллара, наьха кхайкаралашка хьежжа, халача хьалерча наьха, хала лазараш долча унахой дехараш, тӏехьа ца доахаш, кхоачашде лаьрхӏар.
Республикан яхархочун Кӏориганаькъан Заремайна ахчанца новкъостал дир, ДТП чов хинна хьалхарча даькъа заӏапхо вола цун воӏ республикански меттаоттавара центре дарба деш хургва. Хьатӏабоагӏаш ахчан пайда боацаш, йиса Дзовранаькъан Хьулимат а юстара йисанзар, цунна ахчанца гӏо дергда, операци дӏаяхьара новкъостал а дергда. ӏӏ-ча даькъа заӏапхо я Цӏечой Хьава. Ер шу чакхдаллалца цун инсулин оала маха мах боацаш лоаттабе лаьрхӏар, цул тӏехьагӏа из молха даим мах боацаш хургйолаш е а хьожаргба.
Къаьстта йола терко йир наькъа кхерамзленна, берий спорта. Хьоашаланаькъан Абукар латкъаш вар Яндаре Орджоникидзе урамах даим машинаш вӏашкаетталуш хилара, цига нах бовш а, царна човнаш хулаш а моттигаш нийсъеннай. Республикан Минавтотранс, Госавтоинспекци цхьана цига яха лаьрхӏа я, из хьал довза.
Цул совгӏа, къонача спортсмений даьша дехарах Паччахьалкхен кулгалхочо тӏадиллар Магаса «Бешлоам» оалача арена болх кердабаккхар, хӏаьта республикан спорта Министерствонна хьалхашка оттадир цу спортивни гIишлон болх тоабара декхар.
Наьха хаттарашка ладувгIаш дӏабихьача балха чаккхе еш, хӏара хаттар тIачӏоагӏдир, царна тӏахьожам беш хургья министерствош. Сластенин Владимира хьадийхар тӏахьожам чӏоагӏбар, цо белгалдир, бахархой дехараш кхоачашдаь хила дезилга.
