Жӏайрахьарча дарбанче СВО доакъашхой хьал тохкаш хилар мехкара премьер-министр
Жӏайрахьа кхале дарба деш бола тӏема операце ветеранаш болча ваха хилар, мехкарча паччахьалкхен кулгалхо Сластенин Владимир. Даьхен гӏулакха лаьттарашка цига мишта хьож, кхоачамбоацараш дий техкар цо.
«60 сага моттигаш луш йола дегӏа могашал меттаоттаю моттиг Жӏайрахьа кхале 2024-ча шера хьайийллар. Нийсса ах моттигаш СВО доакъашхошта, цар цӏагӏарча наха лаьрхӏа я. Дега, пехкашта, нервашца лазараш дола, дегӏа маьженаш лертӏа болх беш йоаца унахой ба цига ха йоаккхараш. Толашагӏа дола гӏирсаш оттадаь, тоаяь моттиг я из. 2023-ча шера федеральни программага гӏолла 116 млн рузкъа хьожадир цу гӏулакха, хӏаьта укх шера кхы а 13,3 млн сом ахча дӏатӏадахийта хувцамаш даьд. УЗИ, ЭКГ аппараташ, «ден-бус дего бу болх дӏаязбу» гӏирсаш, стабилограф, дегӏа маьженашка дикагӏа болх байта эшаш йола тренажераш, велоэргометр, робота хьисапера тренажер, иштта физиотерапеца, дарбан физкультураца эшаш мел дола гӏирсаш да цу чу тахан», - йоах «Сердалога» мехкарча Паччахьалкхера бенача хоамо.
Сластенин Владимир палаташка хьожаш, лорашца, иштта СВО доакъашхошца цар хьал тохкаш къамаьл деш чакхваьлар цига. Лорашца дийцар цо карарча хана дарбанченна фу эш, малагӏа кхоачамбоацараш да. Цу дарбанчен керттерча, лоархӏамеча декхарех да СВО доакъашхошта, цар гаргарча наха къаьстта лакха терко лоаттаяр, цу наьха хьашташ кхоачашдеш хилар. Хӏара бӏухочун дегӏа, иштта психически хьал теркалдеш хила деза дарба дар.
Дӏадахача шера 38 ветеран, цар цӏагӏара 228 саг хиннав цига дарба дӏахьош, хӏаьта укх шерарча тӏехьарча массехк бетта СВО 21 доакъашхо, цар цӏагӏара 164 саг ва цига хиннараш.
Дарбанче Жӏайрахьа кхале уллаш хилара къаьстта раьза ба унахой, хӏана аьлча цӏена фо, лоаман хоза моттигаш йолча дега хоалуш паргӏатагӏа хет. Дегӏа могашал меттаоттаю моттиг цига хьаеллар лоархӏаме, дукхача наха оатто еш да, хӏана аьлча республикера арабувлаш кхеста безац цар тахан.
